ಮಾವಿನಕಾಯಿ ಹೋಳು ಉಪ್ಪಿನಕಾಯಿ

ಉಪ್ಪಿನಕಾಯಿ ಎಂದರೆ ಊಟ ತಿಂಡಿಯೊಂದಿಗೆ ನೆಂಚಿಕೊಳ್ಳಲು ಇಷ್ತ. ದಕ್ಷಿಣ ಭಾರತದ ಜನ ಮೊಸರನ್ನದ ಒಟ್ಟಿಗೆ ತಿಂದರೆ ಉತ್ತರ ಭಾರತದ ಜನ ಚಪಾತಿ, ಪರೋಟ ಹೀಗೆ ಬದಿಯಲ್ಲಿ ಉಪ್ಪಿನಕಾಯಿ ಇರಲೇಬೇಕು. ಮಂಗಳೂರು, ಉಡುಪಿ, ಮಲೆನಾಡಿನ ಜನತೆಗೆ ಉಪ್ಪಿನಕಾಯಿ ಪ್ರಾಣ. ಯಾಕೆ ಅಂತೀರಾ?  ಕೊಚ್ಚಕ್ಕಿ ಗಂಜಿ, ಇಡ್ಲಿ, ದೋಸೆ, ರೊಟ್ಟಿ ಎಲ್ಲದಕ್ಕೂ ಉಪ್ಪಿನಕಾಯಿ ಬೇಕೇ ಬೇಕು. ಉಪ್ಪಿನಕಾಯಿ ಇಲ್ಲದ ಊಟ ರುಚಿ ಇಲ್ಲ ಅನ್ನೋ ಸ್ವಭಾವದವರು ಈ ಜನ.
ಏನೇ ಇರಲಿ ಮುಂಚೆ ಮನೆ ಮನೆಯಲ್ಲೂ ಉಪ್ಪಿನಕಾಯಿ ಮಾಡುತ್ತಿದ್ದರಂತೆ. ಈಗ ಆ ಸಂಪ್ರದಾಯ ಕೈಯಲ್ಲಿ ಸಾಗ್ತಾ ಇಲ್ಲ. ಉಪ್ಪಿನಕಾಯಿ ತಿನ್ನೋ ಜನ ಕಡಿಮೆಯಾಗ್ತಾ ಬರ್ತಾ ಇರೋದು ಒಂದ್ ಕಡೆಯಾದರೆ, ಮನೇಲಿ ಹಾಕುವ ಅಬ್ಯಾಸ ಇಲ್ಲದವರು ಇನ್ನೊಂದು ಕಡೆ. ಉಪ್ಪಿನಕಾಯಿ ತೊಗೊಂಡುಬಿಡೋಣ ಅನ್ನೋರು ಸುಮಾರು ಜನ. ಹಾಗಾಗಿ ಉಪ್ಪಿನಕಾಯಿ ಮಾಡೋದು ಸ್ವಲ್ಪ ಕಡಿಮೆ ಆಗ್ತಾ ಇದೆ ಅನ್ನಬಹುದು.
ಈ ಉಪ್ಪಿನಕಾಯಿ ಪುರಾಣ ಬಿಟ್ಟು ಉಪ್ಪಿನಕಾಯಿ ಹೇಗೆ ಮಾಡೋದು ಅನ್ನೋದನ್ನ ನೋಡೋಣ .
ಇಲ್ಲಿ ನಾ ಮಾಡ್ತಾ ಇರೋದು ದಿಡೀರ್ ಉಪ್ಪಿನಕಾಯಿ. ಈ ರೀತಿ ಉಪ್ಪಿನಕಾಯಿಯನ್ನ ನಾವು
ಹೋಳು ಉಪ್ಪಿನಕಾಯಿ
ಬೇಕಾದ ಪದಾರ್ಥಗಳು :
ಗಟ್ಟಿಯಾದ ಹಸಿರು ಮಾವಿನಕಾಯಿಗಳು : 10 ರಿಂದ 12
ಉಪ್ಪು : ೧/೨ ಕಪ್, ೪ ರಿಂದ ೫ ದೊಡ್ಡ ಚಮಚ
ಇಂಗು : ಚಿಟಿಕೆ
ಮೆಣಸಿನ ಪುಡಿ ; ೨ ದೊಡ್ಡ ಚಮಚ
ಸಾಸಿವೆ : ೧ ದೊಡ್ಡ ಚಮಚ
ಮೆಂತ್ಯ ; ೧ ಚಿಕ್ಕ ಚಮಚ
ಕೊಬ್ಬರಿ ಎಣ್ಣೆ : ೨ ದೊಡ್ದಚಮಚ
ಸಾಸಿವೆ : ಒಗ್ಗರಣೆಗೆ : ೧ ಚಿಕ್ಕ ಚಮಚ
ನೀರು : ೨ ಸಣ್ಣ ಲೋಟದಷ್ಟು
ವಿಧಾನ :
ಮಾವಿನ ಕಾಯಿಯನ್ನು ಚೆನ್ನಾಗಿ ತೊಳೆದು ಒಂದು ಶುಚಿಯಾದ ಬಟ್ಟೆಯಲ್ಲಿ ಒರೆಸಿ. ನೀರಿನ ಪಸೆ ಸ್ವಲ್ಪ ಸಹ ಇರಬಾರದು.
ಮಾವಿನಕಾಯಿಯನ್ನು ಸಣ್ಣದಾಗಿ ಹೆಚ್ಚಿ ೧ ಸಣ್ಣ ಚಮಚೆಯಷ್ಟು ಉಪ್ಪು ಸೇರಿಸಿ ಕಲೆಸಿಡಿ.
ಒಂದು ಪಾತ್ರೆಯಲ್ಲಿ ಎರಡು ಕಪ್ಪು ನೀರು ಹಾಕಿ, ಮೇಲೆ ಹೇಳಿದಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಕುದಿಸಿ. ಅದು ಕುದಿದು ಅರ್ಧದಷ್ಟು ಪ್ರಮಾಣಕ್ಕೆ ಬಂದಾಗ ಉಪ್ಪು ಸೇರಿಸಿದ ಮಾವಿನಕಾಯಿಯನ್ನು ಕುದಿಯುತ್ತಿರುವ ಉಪ್ಪು ನೀರಿಗೆ ಹಾಕಿ ೨ ರಿಂದ ಮೂರು ನಿಮಿಷದಷ್ಟು ಕುದಿಯಲಿ. ಬೆಂಕಿ ಆರಿಸಿ ಮಾವ್ವು - ಉಪ್ಪಿನ ಮಿಶ್ರಣವನ್ನು ತಣ್ಣಗಾಗಲು ಬಿಡಿ.
ಒಂದು ಸಣ್ಣ ಬಾಣಲೆಯಲ್ಲಿ ಮೆಂತ್ಯ ಹುರಿಯಿರಿ. ಅದು ಕಂದು ಬಣ್ಣಕ್ಕೆ ಬಂದಾಗ ಸಾಸಿವೆ ಸೇರಿಸಿ ಹುರಿಯಿರಿ. ಸಾಸಿವೆ ಪಟ ಪಟ ಹೊಟ್ಟುತ್ತಿದ್ದಂತೆ ಅದನ್ನು ಕೆಳಗಿಟ್ಟು ಮೆಣಸಿನ ಪುಡಿ ಸೇರಿಸಿ. ತಣ್ಣಗಾದ ನಂತರ ಈ ಮಿಶ್ರಣವನ್ನು ಮಿಕ್ಷಿ ಜಾರಲ್ಲಿ ಹಾಕಿ ಸ್ವಲ್ಪ ಪುಡಿ ಮಾಡಿ. ನಂತರ ಈ ಪುಡಿಗೆ ಕುದಿಸಿ ಆರಿಸಿದ ನೀರನ್ನ ಮಾತ್ರ ಸೇರಿಸಿ ಅರೆಯಿರಿ. ಮಿಶ್ರಣ ನುಣ್ಣಗಾಗುವಂತೆ  ಅರೆದು ಈ ಮಿಶ್ರಣವನ್ನು ಮಾವಿನ ಹೋಳುಗಳೊಂದಿಗೆ ಚೆನ್ನಾಗಿ ಬೆರೆಸಿ. ಇದಕ್ಕೆ ಸಾಸಿವೆ, ಇಂಗು, ಕೊಬ್ಬರಿ ಎಣ್ಣೆಯ ಒಗ್ಗರಣೆ ಕೊಡಿ.
ಈಗ ನಿಮ್ಮ ಮಾವಿನ ಹೊಳುಗಳ ಉಪ್ಪಿನಕಾಯಿ ತಯಾರು.  ಚೆನ್ನಾಗಿ ಮತ್ತೊಮ್ಮೆ ಬೆರೆಸಿ ಜಾಲಿ ಆಥವಾ ಗಾಜಿನ ಶೀಷೆಗೆ ಹಾಕಿ. ಈ ಉಪ್ಪಿನಕಾಯಿಯನ್ನು ಕೂಡಲೇ ಉಪಯೋಗಿಸಬಹುದು.
ಗಮನಿಸಿ : ಮಾವಿನಕಾಯಿ ಗಟ್ಟಿಯಾಗಿರಬೇಕು. ಮಾವಿನ ಸಿಪ್ಪೆ ತೆಗೆದು ಸಹ ಹೊಳುಗಳನ್ನ ಉಪ್ಪು ನೀರಲ್ಲಿ ಬೇಯಿಸಬಹುದು. ಹುಳಿ ಮಾವಿನಕಾಯಿ ಉಪಯೋಗಿಸಿದಲ್ಲಿ ಒಳ್ಳೆಯದು. ಉಪ್ಪಿನ ಪ್ರಮಾಣದ ಮೇಲೆ ನಿಗಾ ಇರಲಿ. ಸ್ವಲ್ಪ ಜಾಸ್ತಿಯಾದಲ್ಲಿ ಚೂರು ಮೆಣಸಿನ ಪುಡಿ ಸೇರಿಸಿ.

ಮಾವಿನಕಾಯಿ ಕೆತ್ತೆ ಉಪ್ಪಿನಕಾಯಿ

ಮಾವಿನಕಾಯಿ ಹೋಳು (ಕೆತ್ತೆ) ಉಪ್ಪಿನಕಾಯಿ 

ಮಾವಿನಕಾಯಿ ಕೆತ್ತೆ ಉಪ್ಪಿನಕಾಯಿ ದಕ್ಷಿಣ ಕನ್ನಡ ಹಾಗು ಕರಾವಳಿ, ಉಡುಪಿ ಪ್ರದೆಶಗಳಲ್ಲಿ ಮಾಡುವಂತ ಮತ್ತೊಂದು ಬಗೆಯ ಉಪ್ಪಿನಕಾಯಿ. ಸಾದಾರಣವಾಗಿ ಮಿಡಿ ಉಪ್ಪಿನಕಾಯಿಯ ವಿದಾನವನ್ನೇ ಬಳಸಿ ಮಾಡುವುದು ವಾಡಿಕೆ. ತುಂಬಾ ದಿನ ಉಳಿಯುವ ಈ ಉಪ್ಪಿನಕಾಯಿಯನ್ನ ಗಂಜಿ, ಇಡ್ಲಿ, ದೋಸೆಯೊಂದಿಗೆ ಈಗಲೂ ನೆಂಚಿಕೊಳ್ಳಲು ಉಪಯೋಗಿಸುವರು.
ಕೆತ್ತೆ ಉಪ್ಪಿನಕಾಯಿ ಮಾಡುವ ವಿಧಾನ :
ಬೇಕಾಗುವ ಪದಾರ್ಥಗಳು :
ಮಾವಿನಕಾಯಿಗಳು :  ದೊಡ್ಡದು ಹಾಗು ಸಣ್ಣದು ಎರಡು ಬಗೆಯ ಮಾವಿನಕಾಯಿಯನ್ನು ಉಪಯೋಗಿಸಬಹುದು. ಉಪ್ಪಿನಕಾಯಿಗೆ ಬಳಸುವ ಮಾವಿನಕಾಯಿಯನ್ನೇ ಉಪಯೋಗಿಸಿದರೆ ಒಳ್ಳೆಯದು.  ೫ ರಿಂದ ೬
ಉಪ್ಪು :  ಎರಡರಿಂದ ರಿಂದ ಮೂರು ಮುಷ್ಠಿ ( 2 to 3 Handful)
ಸಾಸಿವೆ : 3 ದೊಡ್ಡ ಚಮಚ
ಮೆಣಸಿನ ಹುಡಿ :5 ರಿಂದ 6 ದೊಡ್ಡ ಚಮಚ
ಇಂಗು : ಸ್ವಲ್ಪ
ಒಗ್ಗರಣೆಗೆ :
ಕೊಬ್ಬರಿ ಎಣ್ಣೆ : 2 ರಿಂದ 3 ದೊಡ್ಡ ಚಮಚ
ಇಂಗು : ಚೂರು
ಮಾಡುವ ವಿಧಾನ :
ಮಾವಿನ ಕಾಯಿಯನ್ನು ಚೆನ್ನಾಗಿ ಬಟ್ಟೆಯಿಂದ ಒರೆಸಿ, ಸಿಪ್ಪೆ ಸಮೇತ ಹೋಳುಗಳಾಗಿ ಹೆಚ್ಚಿ.
ದೊಡ್ಡ ಪಾತ್ರೆಯನ್ನು ಚೆನ್ನಾಗಿ ಒರೆಸಿಕೊಂಡು ಉಪ್ಪು ಮತ್ತು ಮಾನಿನ ಹೋಳುಗಳನ್ನು ಬೆರೆಸಿ. ಒಂದು ಗಾಜಿನ ಕುಪ್ಪಿ/ಶೀಷೆಗೆ ಹಾಕಿ ಮುಚ್ಚಳ ಮುಚ್ಚಿಡಿ. ಇದನ್ನ ಮೂರು ದಿನಗಳ ಕಾಲ  ದಿನಕ್ಕೆ ಒಂದು ಬಾರಿ ಚೆನ್ನಾಗಿ ಕಲೆಸಿಡಬೇಕು. ಉಪ್ಪು ನೀರಾಗಿ ಕರಗುವುದು.
ಒಂದು ಪಾತ್ರೆಯಲ್ಲಿ ನಾಲ್ಕು ಲೋಟೆ ನೀರು ಹಾಕಿ ೨ ಮುಷ್ಠಿ ಉಪ್ಪು ಹಾಕಿ ಕುದಿಸಿ. ಈ ಉಪ್ಪು ನೀರು ಕುಡಿದು ಅರ್ದದಷ್ಟಾಗಬೇಕು. ಈ ನೀರಿಗೆ ಮಾವಿನಕಾಯಿಯಲ್ಲಿ ಕರಗಿದ ಉಪ್ಪು ನೀರನ್ನು ಸೇರಿಸಿ  ೨ ನಿಮಿಷ ಕುದಿಸಿ. ಉಪ್ಪು ನೀರಿನ ಪಾತ್ರೆಯನ್ನು ಕೆಳಗಿರಿಸಿ ತಣ್ಣಗಾಗಲು ಬಿಡಿ. ಒದ್ದೆ ಕೈಯಿಂದ ಈ ನೀರನ್ನು ಮುಟ್ಟಬಾರದು.
ತಣ್ಣಗಾದ ನೀರಿನೊಂದಿಗೆ ಮೇಲೆ ತಿಳಿಸಿದ ಸಾಸಿವೆ ಹಾಗು ಮೆಣಸಿನ ಪುಡಿ ಮಿಕ್ಷಿಯಲ್ಲಿ ನುಣ್ಣಗೆ ಅರೆಯಿರಿ. ಈ ಮಿಶ್ರಣವನ್ನು ಹೋಳು ಮಾವಿನಕಾಯಿಯೊಂದಿಗೆ ಬೆರೆಸಿ. ಚೆನ್ನಾಗಿ ಬೆರೆಸಿ. ನಂತರ ಇಂಗು ಹಾಗು ತೆಂಗಿನ ಎಣ್ಣೆಯ ಒಗ್ಗರಣೆ ಕೊಡಿ. ಎಲ್ಲವನ್ನು ಚೆನ್ನಾಗಿ ಮತ್ತೊಮ್ಮೆ ಬೆರೆಸಿ ಗಾಜಿನ ಶೀಶೆ ಅಥವಾ ಉಪ್ಪಿನಕಾಯಿ ಜಾರಿನಲ್ಲಿ ಹಾಕಿ ಬದ್ರವಾಗಿ ಮುಚ್ಚಿಡಿ. ಬೇಕಾದಲ್ಲಿ ಒಂದೆರಡು ಚಮಚೆ ಎಣ್ಣೆ ಮೇಲಿನಿಂದ ಹಾಕಬಹುದು. ಈ ಉಪ್ಪಿನಕಾಯಿಯನ್ನು ತುಂಬಾ ಬದ್ರವಾಗಿ ಮುಚ್ಚಿಡಬೇಕು. ಎರಡು ವಾರದ ನಂತರ ಮಾವಿನಕಾಯಿ ಕೆತ್ತೆ ಉಪ್ಪಿನಕಾಯಿ ಬಳಸಲು ಯೋಗ್ಯವಾಗಿರುತ್ತದೆ.
ಕಿವಿಮಾತು :
ಯಾವುದೇ ಕಾರಣಕ್ಕೂ ಉಪ್ಪಿನಕಾಯಿ ತಯಾರಿಸುವಾಗ ಒದ್ದೆ ಕೈಯಲ್ಲಿ ಮಾವಿನ ಹೋಳು ಹಾಗು ಕುದ್ದು ಆರಿದ ಉಪ್ಪಿನ ನೀರನ್ನು ಮುಟ್ಟಬಾರದು. ಉಪಯೋಗಿಸುವ ಪಾತ್ರೆಗಳನ್ನು ಒಣ ವಸ್ತ್ರದಲ್ಲಿ ಒರೆಸಿ ಬಳಸಬೇಕು.
ಉದಾಹರಣೆಗೆ : ಮಾವಿನಕಾಯಿ ಹೋಳು ಮತ್ತು ಉಪ್ಪು ಬೆರೆಸುವ ಪಾತ್ರೆ. ಮಿಕ್ಷಿ ಮಾಡುವಾಗ ಮಿಕ್ಷಿ ಜಾರ್ ಮತ್ತೆ ಮುಚ್ಚಳ , ಉಪ್ಪಿನಕಾಯಿ ಹಾಕಿಡುವ ಶೀಶೆ ಅಥವಾ ಉಪ್ಪಿನಕಾಯಿ ಜಾಡಿ. ತುಂಬಾ ಉಪ್ಪಿನಕಾಯಿ ಮಾಡುವಾಗ ಸಾಸಿವೆ ಮತ್ತು ಮೆಣಸಿನ ಕಾಯಿಯನ್ನು ಬಿಸಿಲಿನಲ್ಲಿ ಒಣಗಿಸಿ ಉಪಯೋಗಿಸಿ.
ಮೆಣಸಿನ ಪುಡಿ ಬದಲು ಬ್ಯಾಡಗಿ/ ಘಟ್ಟದ ಮೇಲಿನ ಕೆಂಪು ಮೆಣಸಿನಕಾಯಿ ಉಪಯೋಗಿಸಬಹುದು. ಅದೇ ಸಾಂಪ್ರದಾಯಕ.